Odyssey
Homer
Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.
- εἰ μὲν δὴ μετὰ τοῖσι θυοσκόος εὔχεαι εἶναι,
- πολλάκι που μέλλεις ἀρήμεναι ἐν μεγάροισι
- τηλοῦ ἐμοὶ νόστοιο τέλος γλυκεροῖο γενέσθαι,
- σοὶ δʼ ἄλοχόν τε φίλην σπέσθαι καὶ τέκνα τεκέσθαι·
- τῷ οὐκ ἂν θάνατόν γε δυσηλεγέα προφύγοισθα.
- ὣς ἄρα φωνήσας ξίφος εἵλετο χειρὶ παχείῃ
- κείμενον, ὅ ῥʼ Ἀγέλαος ἀποπροέηκε χαμᾶζε
- κτεινόμενος· τῷ τόν γε κατʼ αὐχένα μέσσον ἔλασσε.
- φθεγγομένου δʼ ἄρα τοῦ γε κάρη κονίῃσιν ἐμίχθη.
- Τερπιάδης δʼ ἔτʼ ἀοιδὸς ἀλύσκανε κῆρα μέλαιναν,
- Φήμιος, ὅς ῥʼ ἤειδε μετὰ μνηστῆρσιν ἀνάγκῃ.
- ἔστη δʼ ἐν χείρεσσίν ἔχων φόρμιγγα λίγειαν
- ἄγχι παρʼ ὀρσοθύρην· δίχα δὲ φρεσὶ μερμήριζεν,
- ἢ ἐκδὺς μεγάροιο Διὸς μεγάλου ποτὶ βωμὸν
- ἑρκείου ἵζοιτο τετυγμένον, ἔνθʼ ἄρα πολλὰ
- Λαέρτης Ὀδυσεύς τε βοῶν ἐπὶ μηρίʼ ἔκηαν,
- ἦ γούνων λίσσοιτο προσαΐξας Ὀδυσῆα.
- ὧδε δέ οἱ φρονέοντι δοάσσατο κέρδιον εἶναι,
- γούνων ἅψασθαι Λαερτιάδεω Ὀδυσῆος.
- ἦ τοι ὁ φόρμιγγα γλαφυρὴν κατέθηκε χαμᾶζε