Iliad
Homer
Homer. Homeri Opera, Volumes 1-2. Monro, D. B. (David Binning), editor; Allen, Thomas W. (Thomas William), editor. Oxford: Clarendon Press, 1908-1920.
- πᾶν δʼ ἦμαρ φερόμην, ἅμα δʼ ἠελίῳ καταδύντι
- κάππεσον ἐν Λήμνῳ, ὀλίγος δʼ ἔτι θυμὸς ἐνῆεν·
- ἔνθά με Σίντιες ἄνδρες ἄφαρ κομίσαντο πεσόντα.
- ὣς φάτο, μείδησεν δὲ θεὰ λευκώλενος Ἥρη,
- μειδήσασα δὲ παιδὸς ἐδέξατο χειρὶ κύπελλον·
- αὐτὰρ ὃ τοῖς ἄλλοισι θεοῖς ἐνδέξια πᾶσιν
- οἰνοχόει γλυκὺ νέκταρ ἀπὸ κρητῆρος ἀφύσσων·
- ἄσβεστος δʼ ἄρʼ ἐνῶρτο γέλως μακάρεσσι θεοῖσιν
- ὡς ἴδον Ἥφαιστον διὰ δώματα ποιπνύοντα.
- ὣς τότε μὲν πρόπαν ἦμαρ ἐς ἠέλιον καταδύντα
- δαίνυντʼ, οὐδέ τι θυμὸς ἐδεύετο δαιτὸς ἐΐσης,
- οὐ μὲν φόρμιγγος περικαλλέος ἣν ἔχʼ Ἀπόλλων,
- Μουσάων θʼ αἳ ἄειδον ἀμειβόμεναι ὀπὶ καλῇ.
- αὐτὰρ ἐπεὶ κατέδυ λαμπρὸν φάος ἠελίοιο,
- οἳ μὲν κακκείοντες ἔβαν οἶκον δὲ ἕκαστος,
- ἧχι ἑκάστῳ δῶμα περικλυτὸς ἀμφιγυήεις
- Ἥφαιστος ποίησεν ἰδυίῃσι πραπίδεσσι·
- Ζεὺς δὲ πρὸς ὃν λέχος ἤϊʼ Ὀλύμπιος ἀστεροπητής,
- ἔνθα πάρος κοιμᾶθʼ ὅτε μιν γλυκὺς ὕπνος ἱκάνοι·
- ἔνθα καθεῦδʼ ἀναβάς, παρὰ δὲ χρυσόθρονος Ἥρη.