Εἰδύλλια
Theocritus
Theocritus. The Idylls of Theocritus. Cholmeley, Roger James, editor. London: George Bell and Sons, Ltd.,1901-1919.
- καὶ τότʼ ἄρʼ ἐξέγροντο, Διὸς νοέοντος ἅπαντα,
- Ἀλκμήνας φίλα τέκνα, φάος δʼ ἀνὰ οἶκον ἐτύχθη.
- ἤτοι ὅγʼ εὐθὺς ἄυσεν, ὅπως κακὰ θηρίʼ ἀνέγνω
- κοίλου ὑπὲρ σάκεος καὶ ἀναιδέας εἶδεν ὀδόντας,
- Ἰφικλέης, οὔλαν δὲ ποσὶν διελάκτισε χλαῖναν,
- φευγέμεν ὁρμαίνων· ὁ δʼ ἐναντίος εἴχετο χερσὶν
- Ἡρακλέης, ἄμφω δὲ βαρεῖ ἐνεδήσατο δεσμῷ,
- δραξάμενος φάρυγος, τόθι φάρμακα λυγρὰ κέκρυπται
- οὐλομένοις ὀφίεσσιν, ἃ καὶ θεοὶ ἐχθαίροντι.
- τὼ δʼ αὖτε σπείραισιν ἑλισσέσθην περὶ παῖδα
- ὀψίγονον γαλαθηνόν, ὑπὸ τροφῷ αἰὲν ἄδακρυν·
- ἂψ δὲ πάλιν διέλυον ἐπεὶ μογέοιεν ἀκάνθας,
- δεσμοῦ ἀναγκαίου πειρώμενοι ἔκλυσιν εὑρεῖν.
- Ἀλκμήνα δʼ ἐσάκουσε βοᾶς καὶ ἐπέγρετο πράτα·
- ̓́Ανσταθʼ Ἀμφιτρύων· ἐμὲ γὰρ δέος ἴσχει ὀκνηρόν·
- ἄνστα, μηδὲ πόδεσσιν ἑοῖς ὑπὸ σάνδαλα θείῃς.
- οὐκ ἀίεις, παίδων ὁ νεώτερος ὅσσον ἀυτεῖ;
- ἢ οὐ νοέεις, ὅτι νυκτὸς ἀωρί που, οἱ δέ τε τοῖχοι
- πάντες ἀριφραδέες, καθαρᾶς ἅπερ ἠριγενείας;
- ἔστί τί μοι κατὰ δῶμα νεώτερον, ἔστι φίλʼ ἀνδρῶν.
152