Cathemerina

Prudentius

Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).

  1. en Persici ex orbis sinu,
  2. sol unde sumit ianuam,
  3. cernunt periti interpretes
  4. regale vexillum magi.
  5. quod ut refulsit, ceteri
  6. cessere signorum globi,
  7. nec pulcher est ausus suam
  8. conferre formam Lucifer.
  9. quis iste tantus inquiunt
  10. ‘regnator astris imperans,
  11. quem sic tremunt caelestia,
  12. cui lux et aethra inserviunt?
  13. inlustre quiddam cernimus,
  14. quod nesciat finem pati,
  15. sublime, celsum, interminum,
  16. antiquius caelo et chao.
  17. hic ille rex est gentium
  18. populique rex Iudaici,
  19. promissus Abrahae patri
  20. eiusque in aevum semini.