Cathemerina
Prudentius
Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).
- gremio senis addita sancti
- recubabit, ut est Eleazar,
- quem floribus undique saeptum
- dives procul aspicit ardens.
- sequimur tua dicta, Redemptor
- quibus atra e morte triumphans
- tua per vestigia mandas
- socium crucis ire latronem.
- patet ecce fidelibus ampli
- via lucida iam paradisi,
- licet et nemus illud adire,
- homini quod ademerat anguis.
- illic, precor, optime ductor,
- famulam tibi praecipe mentem
- genitali in sede sacrari,
- quam liquerat exul et errans.
- nos tecta fovebimus ossa
- violis et fronde frequenti,
- titulumque et frigida saxa
- liquido spargemus odore.