Carmina

Paulinus of Nola, Saint

Paulinus of Nola. Sancti Pontii Meropii Paulini Carmina (Corpus Scriptorum Ecclesiasticorum Latinorum, Volume 30). Hartel, Wilhelm von, editor. Prague, Vienna, Leipzig: Tempsky, Freytag, 1894.

  1. qui credunt sacros uerum cecinisse prophetas
  2. et qui non dubitant uerba manere dei,
  3. . qui Christum passum poenas crucis, ultima mortis,
  4. in toto celsi patris honore uident
  5. quique ipsum multa cum maiestate tremendum
  6. expectant pingui lampade peruigiles,
  7. his sordent terrena, patent caelestia nec se
  8. captiuos seruos temporis huius agunt.
  9. non illos fallax cepit sapientia mundi,
  10. nec curas steriles inseruere polis.
  11. imperia et fasces, indocti munera uulgi,
  12. quasque orbis scelerum semina fecit opes,
  13. calcarunt sancta caelum ambitione petentes
  14. suffragiis Christi et plausibus angelicis.
  15. nec labor hos durus uincit nec blanda uoluptas.
  16. quaerere nil cupiunt, perdere nil metuunt.
  17. omnia non Christi qui Christi est odit, in illo
  18. se statuens, in se qui gerere optat eum.
  19. ille deus rerum, caeli terraeque creator,
  20. me propter sacra uirgine natus homo est.