Panegyricus dictus Manlio Theodoro consuli

Claudian

Claudian, Volume 1. Platnauer, Maurice, editor. Harvard University Press: Cambridge, MA; London, England, 1922.

  1. corporaque aedificent celeri crescentia nexu,
  2. quorum compositam puer amentatus in arcem
  3. emicet et vinctu plantae vel cruribus haerens
  4. pendula librato figat vestigia saltu.
  5. mobile ponderibus descendat pegma reductis
  6. inque chori speciem spargentes ardua flammas
  7. scaena rotet varios et fingat Mulciber orbis
  8. per tabulas impune vagus pictaeque citato
  9. ludant igne trabes et non permissa morari
  10. fida per innocuas errent incendia turres.
  11. lascivi subito confligant aequore lembi
  12. stagnaque remigibus spument inmissa canoris.
  13. Consul per populos idemque gravissimus auctor
  14. eloquii, duplici vita subnixus in aevum
  15. procedat pariter libris fastisque legendus.
  16. accipiat patris exemplum tribuatque nepoti
  17. filius et coeptis ne desit fascibus heres.
  18. decurrat trabeata domus tradatque secures
  19. mutua posteritas servatoque ordine fati
  20. Manlia continuo numeretur consule proles.”