Epistulae

Ausonius, Decimus Magnus

Ausonius, Decimus Magnus. Ausonius, Volume 2. Evelyn-White, Hugh G. (Hugh Gerard), editor. London, Cambridge, MA: William Heinemann, Ltd.; Harvard University Press, 1921.

  1. non licet? anne pudet, si quis tibi iure paterno
  2. vivat amicus adhuc maneasque obnoxius heres?
  3. ignavos agitet talis timor, at tibi nullus
  4. sit metus et morem missae acceptaeque salutis
  5. audacter retine, vel si tibi proditor instat
  6. aut quaesitoris gravior censura finietur,
  7. occurre ingenio, quo saepe occulta teguntur.
  8. Thraeicii quondam quam saeva licentia regis
  9. fecerat elinguem, per licia texta querellas
  10. edidit et tacitis mandavit crimina telis.
  11. et pudibunda suos malo commisit amores
  12. virgo nec erubuit tacituro conscia pomo.
  13. depressis scrobibus vitium regale minister
  14. credidit idque diu texit fidissima tellus:
  15. inspirata dehinc vento cantavit harundo.