Epistulae

Augustine

Augustine. Sancti Aurelii Augustini Opera, Sectio II, Pars I-IV (Corpus Scriptorum Ecclesiasticorum, Volume 34.1-2, 44, 57). Prague, Vienna, Leipzig: Tempsky, Freytag, 1895-1911.

  1. una fides, deus unus et unicus e patre Christus,
  2. haud duplex uni seruitus est domino.
  3. quanta etenim caelo ac terris distantia. tanta est
  4. Caesaris et Christi rebus et imperiis.
  5. tollere humo, sed nunc, dum spiritus hos regit artus,
  6. mente polum penetra, nil mora carnis obest.
  7. corporeis iam nunc morere actibus et bona uitae
  8. caelestis liquido praemeditare animo.
  9. spiritus es, quamquam tenearis corpore, si nunc
  10. mente pia uictor carnis opus perimas.
  11. haec tibi, care puer. fido compulsus amore
  12. scripsi; si recipis, suscipiere deo.
  13. crede Augustinum tibi nunc in me geminatum,
  14. sume duos una cum pietate patres.
  15. spernimur, abstraheris maiore dolore duobus;
  16. audimur, pignus dulce duobus eris.
  17. in te laeta patrum sudauit cura duorum
  18. et tibi magnus honos laetificasse duos.
  19. sed me Augustino cum copulo, non meritorum
  20. iacto parem, solo comparo amore tui.