Punica
Silius Italicus, Tiberius Catius
Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.
- iam sibimet metuens, spirantem dentibus imis
- reiectat praedam et uacuo fugit aeger hiatu.
- †tum demum, Tyriis quas circumfuderat atra
- tempestas, Stygiae tandem fugere tenebrae.
- torpebant dextrae, et sese meruisse negabant
- seruari, subitisque bonis mens aegra natabat:
- ut, qui conlapsa pressi iacuere ruina,
- eruta cum subito membra et nox atra recessit,
- coniuent solemque pauent agnoscere uisu.
- Quis actis senior numerato milite laetus
- collis et tuto repetebat in aggere castra.
- ecce autem e media iam morte renata iuuentus
- clamorem tollens ad sidera et ordine longo
- ibat ouans Fabiumque decus Fabiumque salutem
- certatim et magna memorabant uoce parentem.
- tum qui partitis dissederat ante maniplis
- Sancte ait ‘o genitor, reuocato ad lucis honorem
- si fas uera queri, cur nobis castra uirosque
- diuidere est licitum? patiens cur arma dedisti,
- quae solus rexisse uales? hoc munere lapsi