Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. lentus harenoso spumabat Bagrada campo
  2. uiperea sanie, turmisque minantibus ultro
  3. pugnabat serpens et cum duce bella gerebat.
  4. necnon proiectum puppi frustraque uocantem
  5. numina Amyclaeum mergebat perfida ponto
  6. rectorem manus, et seras tibi, Regule, poenas
  7. Xanthippus digni pendebat in aequore leti.
  8. addiderant geminas medio consurgere fluctu
  9. Aegatis: lacerae circum fragmenta uideres
  10. classis et effusos fluitare in gurgite Poenos.
  11. possessor pelagi pronaque Lutatius aura
  12. captiuas puppis ad litora uictor agebat.
  13. haec inter iuncto religatus in ordine Hamilcar,
  14. ductoris genitor, cunctarum ab imagine rerum
  15. totius in sese uulgi conuerterat ora.
  16. sed Pacis faciem et pollutas foederis aras
  17. deceptumque Iouem ac dictantis iura Latinos
  18. cernere erat. strictas trepida ceruice securis
  19. horrebat Libys, ac summissis ordine palmis
  20. orantes ueniam iurabant inrita pacta.