Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. addita, et, exemplum non umquam fidere laetis,
  2. sceptriferas arta palmas uinxere catena.
  3. ducitur ex alto deiectus culmine regni,
  4. qui modo sub pedibus terras et sceptra patensque
  5. litora ad Oceani sub nutu uiderat aequor.
  6. prostratis opibus regni Phoenissa metuntur
  7. agmina, et inuisus Marti notusque fugarum
  8. uertit terga citus damnatis Hasdrubal ausis.
  9. Stabat Carthago, truncatis undique membris,
  10. uni innixa uiro, tantoque fragore ruentem
  11. Hannibal absenti retinebat nomine molem.
  12. id relicum fessos opis auxiliique ciere
  13. rerum extrema iubent, huc confugere pauentes,
  14. postquam se superum desertos numine cernunt.
  15. nec mora: propulsa sulcant uada salsa carina,
  16. qui reuocent patriaeque ferant mandata monentis,
  17. ne lentus nullas uideat Carthaginis arces.
  18. Quarta Aurora ratem Dauni deuexerat oras,
  19. et fera ductoris turbabant somnia mentem.
  20. namque grauis curis carpit dum nocte quietem,