Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. namque, ubi prosiluit castris, ceu turbidus amnis,
  2. qui siluas ac saxa trahens per deuia praeceps
  3. uoluitur et ripas spumanti gurgite laxat,
  4. ante omnis praeuectus equo trahit agmina uoce.
  5. contra naua manus Rutuli celsusque ruebat
  6. uiso rege procul raptis exercitus armis,
  7. ac sibi quisque: ‘Videsne? uidesne, ut in agmine primo
  8. Massylus uolitet deposcens proelia rector?
  9. fac nostrum hoc, mea dextra, decus. uiolauit et aras
  10. caelicolum et casti ductoris foedera rupit.
  11. sit satis hunc castris semel effugisse crematis.’
  12. sic secum taciti et certatim spicula fundunt.
  13. prima in cornipedis sedit spirantibus ignem
  14. naribus hasta uolans erexitque ore cruento
  15. quadrupedem elatis pulsantem calcibus auras.
  16. corruit asper ecus confixaque cuspide membra
  17. huc illuc iactans rectorem prodidit hosti.
  18. inuadunt uanumque fugae atque attollere fessos
  19. adnitentem artus reuocato a uulnere telo
  20. corripiunt, tum uincla uiro manicaeque, pudendum,