Punica
Silius Italicus, Tiberius Catius
Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.
- rebus opem inque Italos da certa effundere tela.’
- has inter uoces tremulo uenit agmine cornus
- et Neptunicolae transuerberat ora Telonis.
- Vrgebant nihilo leuius iam in limine mortis,
- quos fuga praecipitis partem glomerarat in unam
- puppis, adhuc uacuam taedae. sed, proxima cursu
- fulmineo populatus, ineuitabilis ardor
- correptam flammis inuoluit ouantibus alnum.
- primus, ope aequorei funis delapsus in undas,
- qua nondum Stygios glomerabat Mulciber aestus,
- ambustus socium remis aufertur Himilco.
- proxima nudarunt miserandi fata Batonis
- desertam ductore ratem. bonus ille per artem
- crudo luctari pelago atque exire procellas.
- idem, quid Boreas, quid uellet crastinus Auster,
- anteibat, nec peruigilem tu fallere uultum
- obscuro quamuis cursu, Cynosura, ualeres.
- is, postquam aduersis nullus modus, ‘Accipe nostrum,
- Hammon, sanguinem,’ ait spectator cladis iniquae.
- atque, acto in pectus gladio, dextra inde cruorem