Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. nectare Cecropias Hyblaeo accedere ceras.
  2. hic et Paeonios arcano sulphure fontis,
  3. hic Phoebo digna et Musis uenerabere uatum
  4. ora excellentum, sacras qui carmine siluas
  5. quique Syracosia resonant Helicona camena.
  6. promptae gens linguae, ast eadem, cum bella cieret,
  7. portus aequoreis sueta insignire tropaeis.
  8. Post dirum Antiphatae sceptrum et Cyclopia regna
  9. uomere uerterunt primum noua rura Sicano—
  10. Pyrene misit populos, qui nomen ab amne
  11. ascitum patrio terrae imposuere uacanti.
  12. mox Ligurum pubes Siculo ductore nouauit
  13. possessis bello mutata uocabula regnis.
  14. nec Cres dedecori fuit accola: duxerat actos
  15. moenibus e centum non fausta ad proelia Minos,
  16. Daedaleam repetens poenam. qui fraude nefanda
  17. postquam perpetuas iudex concessit ad umbras
  18. Cocalidum insidiis, fesso Minoia turba
  19. bellandi studio Siculis subsedit in oris.
  20. miscuerunt Phrygiam prolem Troianus Acestes