Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. has inter formas coniunx Iunonis Auernae
  2. suggestu residens cognoscit crimina regum.
  3. stant uincti, seroque piget sub iudice culpae:
  4. circum errant Furiae Poenarumque omnis imago.
  5. quam uellent numquam sceptris fulsisse superbis!
  6. insultant duro imperio non digna nec aequa
  7. ad superos passi manes, quaeque ante profari
  8. non licitum uiuis, tandem permissa queruntur.
  9. tunc alius saeuis religatur rupe catenis,
  10. ast alius subigit saxum contra ardua montis,
  11. uipereo domat hunc aeterna Megaera flagello.
  12. talia letiferis restant patienda tyrannis.
  13. sed te maternos tempus cognoscere uultus,
  14. cuius prima uenit non tardis passibus umbra.’
  15. Astabat fecunda Iouis Pomponia furto.
  16. namque ubi cognouit Latio surgentia bella
  17. Poenorum Venus, insidias anteire laborans
  18. Iunonis fusa sensim per pectora patrem
  19. implicuit flamma. quae ni prouisa fuissent,
  20. Sidonia Iliacas nunc uirgo accenderet aras.