Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. quaedam de numero Lamiarum ac nominis Appi
  2. et farre et vino Ianum Vestamque rogabat,
  3. an Capitolinam deberet Pollio quercum
  4. sperare et fidibus promittere, quid faceret plus
  5. aegrotante viro, medicis quid tristibus erga
  6. filiolum? stetit ante aram nec turpe putavit
  7. pro cithara velare caput dictataque verba
  8. pertulit, ut mos est, et aperta palluit agna.
  9. dic mihi nunc quaeso, die, antiquissime divom,
  10. respondes his, Iane pater? magna otia caeli;
  11. non est, quod video, non est quod agatur aput vos.
  12. haec de comoedis te consulit, illa tragoedum
  13. commendare volet, varicosus fiet haruspex.
  14. Sed cantet potius quam totam pervolet urbem
  15. audax et coetus possit quae ferre virorum
  16. cumque paludatis ducibus praesente marito
  17. ipsa loqui recta facie siccisque mamillis.
  18. haec eadem novit quid toto fiat in orbe, quid Seres,
  19. quid Thraces agant, secreta novercae
  20. et pueri, quis amet, quis diripiatur adulter;