Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. Credo Pudicitiam Saturno rege moratam
  2. in terris visamque diu, cum frigida parvas
  3. praeberet spelunca domos ignemque Laremque
  4. et pecus et dominos communi clauderet umbra,
  5. silvestrem montana torum cum sterneret uxor
  6. frondibus et culmo vicinarumque ferarum
  7. pellibus, haut similis tibi, Cynthia, nec tibi, cuius
  8. turbavit nitidos extinctus passer ocellos,
  9. sed potanda ferens infantibus ubera magnis
  10. et saepe horridior glandem ructante marito.
  11. quippe aliter tunc orbe novo caeloque recenti
  12. vivebant homines, qui rupto robore nati
  13. compositive luto nullos habuere parentes.
  14. multa Pudicitiae veteris vestigia forsan
  15. aut aliqua exstiterint et sub Iove, set Iove nondum
  16. barbato, nondum Graecis iurare paratis
  17. per caput alterius, cum furem nemo timeret
  18. caulibus et pomis, et aperto viveret horto.
  19. paulatim deinde ad superos Astraea recessit
  20. hac comite, atque duae pariter fugere sorores.