Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. et sane quo tot rixantis milia turbae,
  2. si vivunt omnes? ergo acrior impetus, et iam
  3. saxa inclinatis per humum quaesita lacertis
  4. incipiunt torquere, domestica seditioni
  5. tela: nec hunc lapidem, qualis et Turnus et Aiax,
  6. vel quo Tydides percussit pondere coxam
  7. Aeneae, sed quem valeant emittere dextrae
  8. illis dissimiles et nostro tempore natae.
  9. nam genus hoc vivo iam decrescebat Homero;
  10. terra malos homines nunc educat atque pusillos;
  11. ergo deus quicumque aspexit, ridet et odit.
  12. A deverticulo repetatur fabula, postquam
  13. subsidiis aucti, pars altera promere ferrum
  14. audet et infestis pugnam instaurare sagittis,
  15. terga fugae[*](fugae POT: fuga Ψ. The correct reading instantibus Ombis is preserved by O only.) celeri praestant instantibus Ombis
  16. qui vicina colunt umbrosae Tentyra palmae,
  17. labitur hic quidam nimia formidine cursum
  18. praecipitans capiturque. ast illum in plurima sectum
  19. frusta et particulas, ut multis mortuus unus
  20. sufficeret, totum corrosis ossibus edit