Noctes Atticae

Gellius, Aulus

Gellius, Aulus. The Attic Nights of Aulus Gellius. Rolfe, John C., editor. Cambridge, Mass.; London: Harvard University Press; William Heinemann, 1927 (printing).

Quod Homerus, inquit, cum in principio carminis Achillem esse filium Pelei diceret, quis esset Peleus non addidit; quam rem procul, inquit, dubio dixisset, nisi ab Hesiodo iam dictum videret. De Cyclope itidem, inquit, vel maxime quod unoculus fuit, rem tam insignem non praeterisset, nisi aeque prioris Hesiodi carminibus invulgatum esset.

De patria quoque Homeri multo maxime dissensum est. Alii Colophonium, alii Smyrnaeum, sunt

qui Atheniensem, sunt etiam qui Aegyptium fuisse dicant, Aristoteles tradidit ex insula Io.

M. Varro in libro De Imaginibus primo Homeri imagini epigramma hoc apposuit.

  1. Capélla Homeri candida haec tumulum índicat,
  2. Quod hac mórtuo faciúnt sacra.

Largum atque avidum bibendi a P. Nigidio, doctissimo viro, nova et prope absurda vocabuli figura bibosum dictum.

BIBENDI avidum P. Nigidius in Commentariis bibacem et bibosum dicit.

Bibacem ego, ut edacem, a plerisque aliis dictum lego; bibosum dictum nondum etiam usquam repperi nisi apud Laberium, neque aliud est quod simili inclinatu dicatur.

Non enim simile est ut vinosus aut vitiosus ceteraque quae hoc modo dicuntur, quoniam a vocabulis, non a verbo, inclinata sunt.

Laberius in mimo, qui Salinator inscriptus est, verbo hoc ita utitur:

  1. Nón mammosa, nón annosa, nón bibosa, nón procax.

Quod Demosthenes etiamtum adulescens, cum Platonis philosophi discipulus foret, audito forte Callistrato rhetore in contione populi, destitit a Platone et sectatus Callistratum est.

HERMIPPUS hoc scriptum reliquit, Demosthenen admodum adulescentem ventitare in Academiam

Platonemque audire solitum.

Atque is, inquit, Demosthenes domo egressus, ut ei mos erat, cum ad Platonem pergeret complurisque populos concurrentes videret, percontatur eius rei causam cognoscitque currere eos auditum Callistratum.

Is Callistratus Athenis orator in republica fuit quos illi δημαγωγούς appellant.

Visum est paulum devertere experirique an digna auditio tanto properantium studio foret.

Venit, inquit, atque audit Callistratum nobilem illam τὴν περὶ Ὠρωποῦ δίκην dicentem, atque ita motus et demultus [*](For demulctus from demulceo.) et captus est ut Callistratum iam inde sectari coeperit Academiam cum Platone reliquerit.

Dimidium librum legi aut dimidiam fabulam audivi aliaque huiuscemodi qui dicat, vitiose dicere; eiusque vitii causas reddere M. Varronem; nec quemquam veterem hisce verbis ita usum esse.

DIMIDIUM librum legi aut dimidiam fabulam audivi, vel quid aliud huiuscemodi, male ac vitiose dici existumat Varro.

Oportet enim, inquit, dicere dimidiatum librum, non dimidium, et dimidiatam fabulam, non dimidiam. Contra autem si ex sextario hemina fusa est, non dimidiatum sed dimidium, [*](sed dimidium, added by Skutsch.) sextarium fusum dicendum

est, et qui ex mille nummum, quod ei debebatur, quingentos recepit, non dimidiatum recepisse dicemus, sed dimidium.

At si , inquit, argenteus mihi cum alio communis in duas partis disiectus sit,dimidiatum eum esse dicere scyphum debeo, non dimidium, argenti autem, quod in eo scypho inest, dimidium meum esse, non dimidiatum ;

disseritque ac dividit subtilissime quid dimidium dimidiato intersit,

et Q. Ennium scienter hoc in Annalibus dixisse ait:

  1. Sicuti si quis ferat vas vini dimidiatum,
sicuti pars quae deest ei vaso non dimidiata dicenda est, sed dimidia.