Noctes Atticae

Gellius, Aulus

Gellius, Aulus. The Attic Nights of Aulus Gellius. Rolfe, John C., editor. Cambridge, Mass.; London: Harvard University Press; William Heinemann, 1927 (printing).

Locum in quo bustum est numquam ingreditur, mortuum numquam attingit;

funus tamen exequi non est religio.

Eaedem ferme caerimoniae sunt flaminicae Dialis; alias seorsum aiunt observitare,

veluti est quod venenato operitur

et quod in rica surculum de arbore felici habet et quod scalas,

nisi [*](nisi, added by Scaliger.) quae Graecae appellantur, escendere ei plus tribus gradibus religiosum est atque etiam,

cum it ad Argeos, quod neque comit caput neque capillum depectit.

Verba praetoris ex edicto perpetuo de flamine Diali et de sacerdote Vestae adscripsi: Sacerdotem Vestalem et flaminem Dialem in omni mea iurisdictione iurare non cogam.

Verba M. Varronis ex secundo Rerum Divinarum super flamine Diali haec sunt: Is solum album habet galerum, vel quod maximus, vel quod immolata hostia alba id fieri oporteat.

Quos errores Iulius Hyginus in sexto Vergilii animadverterit, in Romana historia erratos.

REPREHENDIT Hyginus Vergilium correcturumque eum fuisse existimat quod in libro sexto scriptum est.

Palinurus est aput inferos, petens ab Aenea ut suum corpus requirendum et sepeliendum curet. Is hoc dicit:

  1. Eripe me his, invicte, malis, aut tu mihi terram
  2. , namque potes, portusque require Velinos.

Quo, inquit, modo aut Palinurus novisse et nominare potuit portus Velinos aut Aeneas ex eo nomine locum invenire, cum Velia oppidum, a quo portum qui in eo loco est Velinum dixit, Servio Tullio Romae regnante, post annum amplius sescentesimum quam Aeneas in Italiam venit conditum in agro Lucano et eo nomine appellatum est?

Nam qui ab Harpalo, inquit, regis Cyri praefecto, ex terra Phocide fugati sunt, alii Veliam, partim Massiliam condiderunt.

Inscitissime igitur petit ut Aeneas portum Velinum requirat, cum id nomen eo tempore fuerit [*](fuerit, Π; fuit, ω.) nusquam gentium.

Neque simile, inquit, illud videri debet, quod est in primo carmine:

  1. Italiam fato profugus venit
  2. Litora,
et aeque in sexto libro:

  1. Chalcidicaque levis tandem superastitit arce,

quoniam poetae ipsi quaedam κατὰ πρόληψιν historiae dicere ex sua persona concedi solet, quae facta ipse postea scire potuit, sicut Vergilius scivit de Lavinio oppido et de colonia Chalcidicensi.

Sed Palinuros qui potuit, inquit, scire ea quae post annos sescentos facta sunt, nisi quis eum divinasse aput inferos putat, proinde ut animae defunctorum solent?

Sed et si ita accipias, quamquam non ita dicitur, Aeneas tamen, qui non divinabat, quo pacto potuit requirere portum Velinum, cui nomen tunc, sicut diximus, nullum usquam fuit?