Argonautica
Valerius Flaccus, Gaius
Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.
- Cymothoe Glaucusque manu; pater ipse profundi
- has etiam sedes, haec numine tradidit aequo
- regna nec Inois noster sinus invidet undis.'
- dixerat et maestos tranquilla sub aequora vultus[*](uultus SM, uultu V )
- cum gemitu tulit, ut patrii rediere dolores.
- tum pelago vina invergens dux talibus infit:
- 'undarum decus et gentis, Cretheia virgo,
- pande viam cursuque tuos age, diva, secundo',
- immittitque ratem mediasque intervolat urbes,
- qua brevibus furit aestus aquis Asiamque prementem
- effugit abruptis Europa immanior oris.
- has etiam terras consertaque gentibus arva
- sic pelago pulsante, reor, Neptunia quondam
- cuspis et adversi longus labor abscidit aevi,
- ut Siculum Libycumque latus, stupuitque fragore[*](fragorem C, fort. recte )
- Ianus et occiduis regnator montibus Atlans.
- iam iuga Percotes[*](Percotes Bon. 2, percotis VC ) Pariumque infame fragosis
- exsuperant Pityamque[*](Pityamque Bon. 2, phyamque V ) vadis, transmissaque puppi
- Lampsacus, Ogygii[*](ogygti V ) quam nec trieterica Bacchi
- sacra neque arcanis Phrygius furor invehit antris,
p.53