Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. Salmacis et viduae Cebrenidos arida luctu
  2. flumina et Herculei praedatrix cedat alumni,
  3. vos mihi, quae Latium septenaque culmina, nymphae,
  4. incolitis Thybrimque novis attollitis undis,
  5. quas praeceps Anien atque exceptura natatus
  6. Virgo iuvat Marsasque nives et frigora ducens
  7. Marcia, praecelsis quarum vaga molibus unda
  8. crescit et innumero pendens transmittitur arcu—:
  9. vestrum opus aggredimur, vestra est. quam carmine molli
  10. pando, domus, non umquam aliis habitastis in antris
  11. ditius. ipsa manus tenuit Cytherea mariti
  12. monstravitque artes: neu vilis flamina caminos
  13. ureret, ipsa faces volucrum succendit Amorum.
  14. non huc admissae Thasos aut undosa Carystos,
  15. maeret onyx longe, queriturque exclusus ophites:
  16. sola nitet flavis Nomadum decisa metallis
  17. purpura, sola cavo Phrygiae quam Synnados antro
  18. ipse cruentavit maculis lucentibus [*]() Attis,
  19. quasque Tyrus [*]() niveas secat et Sidonia rupes,
  20. vix locus Eurotae, viridis cum regula longo