Thebais
Statius, P. Papinius (Publius Papinius)
Statius, P. Papinius. Statius, Volumes 1-2. Mozley, John Henry, editor. London: William Heinemann; New York: G.P. Putnam's Sons, 1928.
- anne triumphatos fugiam captivus ad Indos?
- da sedem profugo! potuit Latonia frater
- saxa — nec invideo — defigere Delon et imis
- commendare fretis; cara submovit ab arce
- hostiles Tritonis aquas; vidi ipse potentem
- gentibus Eois Epaphum dare iura, nec ullas
- Cyllene secreta tubas Minoave curat
- Ida: quid heu tantum nostris offenderis aris?
- hic tibi — quando minor iam nostra potentia — noctes
- Herculeae placitusque vagae Nycteidos ardor,
- hic Tyrium genus et nostro felicior igne
- taurus: Agenoreos saltem tutare nepotes.’
- Invidiam risit pater, et iam poplite flexum
- sternentemque manus tranquillus ad osenla tollit
- inque vicem placida orsa refert: ‘non coniugis ista
- consiliis, ut rere, puer, nec saeva roganti
- sic expostus ego: immoto deducimur orbe
- fatorum; veteres seraeque in proelia causae.
- nam cui tanta quies irarum aut sanguinis usus
- parcior humani? videt axis et ista per aevom