Thebais

Statius, P. Papinius (Publius Papinius)

Statius, P. Papinius. Statius, Volumes 1-2. Mozley, John Henry, editor. London: William Heinemann; New York: G.P. Putnam's Sons, 1928.

  1. non comites, non ferre piae [*]() vestigia natae
  2. aeque valent: tantum miserae dolor ultimus addit
  3. robur, et exsangues crudescunt luctibus anni.
  4. iamque decus galeae, iam spicula saeva ligabat
  5. ductor et ad lituos hilarem intrepidumque tubarum
  6. prospiciebat equum, subito cum apparuit ingens
  7. mater, et ipse metu famulumque expalluit omnis
  8. coetus, et oblatam retro dedit armiger hastam.
  9. ‘quis furor? unde iterum regni integrata resurgit
  10. Eumenis? ipsi etiam post omnia, comminus ipsi
  11. stabitis? usque adeo geminas duxisse cohortes
  12. et facinus mandasse parum est? quo deinde redibit
  13. victor? in hosne sinus? o diri coniugis olim
  14. felices tenebrae! datis, improba lumina, poenas,
  15. haec spectanda dies? quo, saeve, minantia flectis
  16. ora? quid alternus voltus pallorque ruborque
  17. mutat, et obnixi frangunt mala murmura dentes?
  18. me miseram, vinces! prius haec tamen arma necesse est
  19. experiare domi: stabo ipso in limine portae
  20. auspicium infelix scelerumque immanis imago.