Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Abiturus illuc, quo priores abierunt,
  2. Quid mente caeca miserum torques spiritum?
  3. Tibi dico, avare, gaudium heredis tui,
  4. Qui ture superos, ipsum te fraudas cibo,
  5. Qui tristis audis musicum citharae sonum,
  6. Quem tibiarum macerat iucunditas,
  7. Obsoniorum pretia cui gemitum exprimunt,
  8. Qui dum quadrantes aggeras patrimonio
  9. Caelum fatigas sordido periurio,
  10. Qui circumcidis omnem impensam funeri
  11. Libitina ne quid de tuo faciat lucri.
  1. Quid iudicare cogitet livor modo,
  2. Licet dissimulet, pulchre tamen intellego.
  3. Quicquid putabit esse dignum memoria,
  4. Aesopi dicet; si quid minus arriserit,
  5. A me contendet fictum quovis pignore.
  6. Quem volo refelli iam nunc responso meo:
  7. Sive hoc ineptum sive laudandum est opus,
  8. Invenit ille, nostra perfecit manus.
  9. Sed exsequamur coepti propositum ordinem.