Ibis

Ovid

Ovid. P. Ovidius Naso, Volume 3: Tristia, Ibis, Ex Ponto Libri, Fasti. Ehwald, Rudolf; Merkel, Rudolph; editors. Leipzig: B. G. Teubner, 1889.

  1. Fixus et in duris carparis viscera saxis ,
  2. Ut cui Pyrrha sui filia fratris erat .
  3. Ut puer Harpagides referas exempla Thyestae ;
  4. Inque tui caesus viscera patris eas .
  5. Trunca geras saevo mutilatis partibus ense,
  6. — Qualia Mamertae membra fuisse ferunt .
  7. Utque Syracosio praestricta fauce poetae,
  8. Sic animae laqueo sit via clausa tuae .
  9. Nudave derepta pateant tua viscera pelle ,
  10. Ut Phrygium cuius nomina flumen habet.
  11. Saxificae videas infelix ora Medusae ,
  12. Cephenum multos quae dedit una neci.
  13. Potniadum morsus subeas , ut Glaucus , equarum ,
  14. Inque maris salias , Glaucus ut alter , aquas .
  15. Utque duobus idem dictis modo nomen habenti,
  16. Praefocent animae noxia mella viam .
  17. Sollicitoque bibas , Anyti doctissimus olim
  18. Inperturbato quod bibit ore reus .
  19. Nec tibi , siquid amas , felicius Haemone cedat :
  20. Utque sua Macareus , sic potiare tua .