Ibis

Ovid

Ovid. P. Ovidius Naso, Volume 3: Tristia, Ibis, Ex Ponto Libri, Fasti. Ehwald, Rudolf; Merkel, Rudolph; editors. Leipzig: B. G. Teubner, 1889.

  1. Sic tua nescio qua semper fortuna liquescat,
  2. Lapsaque per medias effluat usque manus.
  3. Utque pater solitae varias mutare figuras,
  4. Plenus inextincta destituare fame .
  5. Nec dapis humanae tibi sint fastidia . quaque
  6. Parte potes , Tydeus temporis huius eris .
  7. Atque aliquid facias , a vespere Solis ad ortus
  8. Cur externati rursus agantur equi.
  9. Foeda Lycaoniae repetes convivia mensae,
  10. Temptabisque cibi fallere fraude Iovem .
  11. Teque aliquis posito temptet vim numinis opto,
  12. Tantalides ut sis tu Celeique puer.
  13. Et tua sic latos spargantur membra per agros ,
  14. Tamquam quae patrias detinuere vias .
  15. Aere Perilleo veros imitere iuvencos,
  16. Ad formam tauri conveniente sono .
  17. Utque ferox Phalaris , lingua prius ense resecta
  18. More bovis Paphio clausus in aere gemas.
  19. Dumque redire voles aevi melioris in annos,
  20. Ut vetus Admeti decipiare socer .