Tristia

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. utque neque insidias capitisque pericula narrem,
  2. vera quidem, veri [*](veri vera vel vidi corr. Francius) sed graviora fide,
  3. vivere quam miserum est inter Bessosque Getasque
  4. illum, qui populi semper in ore ruit .
  5. quam miserum est, porta vitam muroque tueri,
  6. vixque sui tutum viribus esse loci!
  7. aspera militiae iuvenis certamina fugi,
  8. nec nisi lusura movimus arma manu;
  9. nunc senior gladioque latus scutoque sinistram,
  10. canitiem galeae subicioque meam.
  11. nam dedit e specula custos ubi signa tumultus,
  12. induimus trepida protinus arma manu.
  13. hostis, habens arcus imbutaque tela venenis, [*](veneno)
  14. saevus anhelanti moenia lustrat equo,
  15. utque rapax pecudem, quae se non texit ovili,
  16. per sata, per silvas fertque trahitque lupus,
  17. sic, siquem nondum portarum saepe [*](sede: saepe σ ) receptum
  18. barbarus in campis repperit hostis, habet:
  19. aut sequitur captus coniectaque vincula collo
  20. accipit, aut telo virus habente perit.