Tristia
Ovid
Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).
- forsitan hoc studium possit furor esse videri,
- sed quiddam furor hic utilitatis habet,
- semper in obtutu mentem vetat esse malorum,
- praesentis casus inmemoremque facit,
- utque suum Bacche non sentit saucia vulnus,
- dum stupet Idaeis exululata modis,
- sic ubi mota calent viridi mea pectora thyrso,
- altior humano spiritus ille malo est.
- ille nec exilium, Scythici nec litora ponti,
- ille nec iratos sentit habere deos.
- utque soporiferae biberem si pocula Lethes,
- temporis adversi sic mihi sensus abest.