Tristia

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. dum petit infirmis nimium sublimia pennis
  2. Icarus, aequoreas nomine fecit aquas. [*](Icarias: aequoreis nomina fecit aquis σ )
  3. difficile est tamen hinc, remis utaris an aura,
  4. dicere: consilium resque locusque dabunt,
  5. si poteris vacuo tradi, si cuncta videbis
  6. mitia, si vires fregerit ira suas,
  7. siquis erit, qui te dubitantem et adire timentem
  8. tradat, et ante tamen pauca loquatur, adi.
  9. luce bona dominoque tuo felicior ipso
  10. pervenias illuc et mala nostra leves.
  11. namque ea vel nemo, vel qui mihi vulnera fecit
  12. solus Achilleo tollere more potest.
  13. tantum ne noceas, dum vis prodesse, videto—
  14. nam spes est animi nostra timore minor—
  15. quaeque quiescebat, ne mota resaeviat ira
  16. et poenae tu sis altera causa, cave!
  17. cum tamen in nostrum fueris penetrale receptus,
  18. contigerisque tuam, scrinia curva, domum,
  19. aspicies illic positos ex ordine fratres,
  20. quos studium cunctos evigilavit idem.