Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. est prope piscosos lapidosi Crathidis amnes
  2. parvus ager: Cameren incola turba vocat,
  3. illuc cursus erat, nec longius afuit inde,
  4. quam quantum novies mittere funda potest:
  5. vela cadunt primo et dubia librantur ab aura.
  6. findite remigio navita dixit aquas!
  7. dumque parant torto subducere carbasa lino,
  8. percutitur rapido puppis adunca noto
  9. inque patens aequor frustra pugnante magistro
  10. fertur, et ex oculis visa refugit humus,
  11. adsiliunt fluctus, imoque a gurgite pontus
  12. vertitur, et canas alveus haurit aquas,
  13. vincitur ars vento, nec iam moderator habenis
  14. utitur; a votis is quoque poscit opem.
  15. iactatur tumidas exul Phoenissa per undas
  16. humidaque opposita lumina veste tegit:
  17. tunc primum Dido felix est dicta sorori
  18. et quaecumque aliquam corpore pressit humum
  19. figitur ad Laurens ingenti flamine litus
  20. puppis et expositis omnibus hausta perit.