Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. ventris erat pro ventre locus, pendere putares
  2. pectus et a spinae tantummodo crate teneri.
  3. Auxerat articulos macies, genuumque tumebat
  4. orbis, et inmodico prodibant tubere tali.
  5. Hanc procul ut vidit (neque enim est accedere iuxta
  6. ausa), refert mandata deae: paulumque morata,
  7. quamquam aberat longe, quamquam modo venerat illuc,
  8. visa tamen sensisse famem retroque dracones
  9. egit in Haemoniam, versis sublimis habenis.
  10. Dicta Fames Cereris, quamvis contraria semper
  11. illius est operi, peragit. Perque aera vento
  12. ad iussam delata domum est et protinus intrat
  13. sacrilegi thalamos altoque sopore solutum
  14. (noctis enim tempus) geminis amplectitur ulnis:
  15. seque viro inspirat faucesque et pectus et ora
  16. adflat et in vacuis spargit ieiunia venis.
  17. Functaque mandato fecundum deserit orbem
  18. inque domos inopes adsueta revertitur antra.
  19. Lenis adhuc somnus placidis Erysichthona pennis
  20. mulcebat: petit ille dapes sub imagine somni