Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. iusta gerit certe pro nato bella perempto
  2. et causaque valet causamque tenentibus armis,
  3. et, puto, vincemur. Quis enim manet exitus urbem,
  4. cum suus haec illi reserabit moenia Mavors
  5. et non noster amor? Melius sine caede moraque
  6. impensaque sui poterit superare cruoris.
  7. Non metuam certe, ne quis tua pectora, Minos,
  8. vulneret imprudens. Quis enim tam durus, ut in te
  9. dirigere inmitem non inscius audeat hastam?
  10. Coepta placent, et stat sententia tradere mecum
  11. dotalem patriam finemque imponere bello.
  12. Verum velle parum est! Aditus custodia servat
  13. claustraque portarum genitor tenet: hunc ego solum
  14. infelix timeo, solus mea vota moratur.
  15. Di facerent, sine patre forem! — Sibi quisque profecto
  16. est deus: ignavis precibus Fortuna repugnat.
  17. Altera iamdudum succensa cupidine tanto
  18. perdere gauderet quodcumque obstaret amori.
  19. Et cur ulla foret me fortior? Ire per ignes
  20. et gladios ausim. Nec in hoc tamen ignibus ullis