Metamorphoses
Ovid
Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.
- efficit et lecto circumdata collocat arte.
- Ut venere torum coniunx et adulter in unum,
- arte viri vinclisque nova ratione paratis
- in mediis ambo deprensi amplexibus haerent.
- Lemnius extemplo valvas patefecit eburnas
- admisitque deos: illi iacuere ligati
- turpiter; atque aliquis de dis non tristibus optat
- sic fieri turpis: superi risere, diuque
- haec fuit in toto notissima fabula caelo.
- Exigit indicii memorem Cythereia poenam,
- inque vices illum, tectos qui laesit amores,
- laedit amore pari. Quid nunc, Hyperione nate,
- forma colorque tibi radiataque lumina prosunt?
- Nempe tuis omnes qui terras ignibus uris,
- ureris igne novo; quique omnia cernere debes,
- Leucothoen spectas, et virgine figis in una,
- quos mundo debes oculos. Modo surgis Eoo
- temperius caelo, modo serius incidis undis,
- spectandique mora brumales porrigis horas,
- deficis interdum, vitiumque in lumina mentis