Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. et cum Lenaeo genialis consitor uvae,
  2. Nycteliusque Eleleusque parens et Iacchus et Euhan,
  3. et quae praeterea per Graias plurima gentes
  4. nomina, Liber, habes. Tibi enim inconsumpta iuventa est,
  5. tu puer aeternus, tu formosissimus alto
  6. conspiceris caelo, tibi, cum sine cornibus adstas,
  7. virgineum caput est. Oriens tibi victus, adusque
  8. decolor extremo qua tingitur India Gange:
  9. Penthea tu, venerande, bipenniferumque Lycurgum
  10. sacrilegos mactas, Tyrrhenaque mittis in aequor
  11. corpora, tu biiugum pictis insignia frenis
  12. colla premis lyncum; bacchae satyrique sequuntur,
  13. quique senex ferula titubantes ebrius artus
  14. sustinet et pando non fortiter haeret asello.
  15. Quacumque ingrederis, clamor iuvenalis et una
  16. femineae voces inpulsaque tympana palmis
  17. concavaque aera sonant longoque foramine buxus.
  18. “Placatus mitisque” rogant Ismenides “adsis,”
  19. iussaque sacra colunt. Solae Minyeides intus
  20. intempestiva turbantes festa Minerva