Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. “O et de Latio, o et de gente Sabina
  2. praecipuum, matrona, decus, dignissima tanti
  3. ante fuisse viri, coniunx nunc esse Quirini,
  4. siste tuos fletus et, si tibi cura videndi
  5. coniugis est, duce me lucum pete, colle Quirini
  6. qui viret et templum Romani regis obumbrat.”
  7. Paret et in terram pictos delapsa per arcus
  8. Hersilien iussis compellat vocibus Iris.
  9. Illa verecundo vix tollens lumina vultu
  10. “o, dea, namque mihi nec, quae sis, dicere promptum est,
  11. et liquet esse deam, duc, o duc” inquit “et offer
  12. coniugis ora mihi, quem si modo posse videre
  13. fata semel dederint, caelum accepisse fatebor.”
  14. Nec mora, Romuleos cum virgine Thaumantea
  15. ingreditur colles: ibi sidus ab aethere lapsum
  16. decidit in terras, a cuius lumine flagrans
  17. Hersilie crines cum sidere cessit in auras.
  18. Hanc manibus notis Romanae conditor urbis
  19. excipit et priscum pariter cum corpore nomen
  20. mutat Horamque vocat, quae nunc dea iuncta Quirino est.