Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. nuda riget, rodunt arentia saxa capellae.
  2. Ecce facit mediis natas Orione Thebis,
  3. agmen femineum, iugulo dare pectus aperto,
  4. illas demisso per inertia vulnera telo
  5. pro populo cecidisse suo pulchrisque per urbem
  6. funeribus ferri celebrique in parte cremari,
  7. tum de virginea geminos exire favilla,
  8. ne genus intereat, iuvenes, quos fama Coronos
  9. nominat, et cineri materno ducere pompam.
  10. Hactenus antiquo signis fulgentibus aere,
  11. summus inaurato crater erat asper acantho.
  12. Nec leviora datis Troiani dona remittunt
  13. dantque sacerdoti custodem turis acerram,
  14. dant pateram claramque auro gemmisque coronam.
  15. Inde recordati Teucros a sanguine Teucri
  16. ducere principium, Cretam tenuere locique
  17. ferre diu nequiere Iovem, centumque relictis
  18. urbibus Ausonios optant contingere portus:
  19. saevit hiems iactatque viros, Strophadumque receptos
  20. portubus infidis exterruit ales Aello.