Art of Love

Ovid

Ovid, 43 B.C.-17 or 18 A.D, creator; Ehwald, Rudolf, 1847-1927, editor; Merkel, Rudolf, 1811-1885, editor

  1. Reticuloque pilae leves fundantur aperto,
  2. Nec, nisi quam tolles, ulla movenda pila est.
  3. Est genus, in totidem tenui ratione redactum
  4. Scriptula, quot menses lubricus annus habet:
  5. Parva tabella capit ternos utrimque lapillos,
  6. In qua vicisse est continuasse suos.
  7. Mille facesse iocos; turpe est nescire puellam
  8. Ludere: ludendo saepe paratur amor.
  9. Sed minimus labor est sapienter iactibus uti:
  10. Maius opus mores composuisse suos.
  11. Tum sumus incauti, studioque aperimur in ipso,
  12. Nudaque per lusus pectora nostra patent;
  13. Ira subit, deforme malum, lucrique cupido,
  14. Iurgiaque et rixae sollicitusque dolor:
  15. Crimina dicuntur, resonat clamoribus aether,
  16. Invocat iratos et sibi quisque deos:
  17. Nulla fides, tabulaeque novae per vota petuntur;
  18. Et lacrimis vidi saepe madere genas.
  19. Iuppiter a vobis tam turpia crimina pellat,
  20. In quibus est ulli cura placere viro.