Art of Love

Ovid

Ovid, 43 B.C.-17 or 18 A.D, creator; Ehwald, Rudolf, 1847-1927, editor; Merkel, Rudolf, 1811-1885, editor

  1. Pectora dum gaudent nec sunt adstricta dolore,
  2. Ipsa patent, blanda tum subit arte Venus.
  3. Tum, cum tristis erat, defensa est Ilios armis:
  4. Militibus gravidum laeta recepit equum.
  5. Tum quoque temptanda est, cum paelice laesa dolebit:
  6. Tum facies opera, ne sit inulta, tua.
  7. Hanc matutinos pectens ancilla capillos
  8. Incitet, et velo remigis addat opem,
  9. Et secum tenui suspirans murmure dicat
  10. 'At, puto, non poteras ipsa referre vicem.'
  11. Tum de te narret, tum persuadentia verba
  12. Addat, et insano iuret amore mori.
  13. Sed propera, ne vela cadant auraeque residant:
  14. Ut fragilis glacies, interit ira mora.
  15. Quaeris, an hanc ipsam prosit violare ministram?
  16. Talibus admissis alea grandis inest.
  17. Haec a concubitu fit sedula, tardior illa,
  18. Haec dominae munus te parat, illa sibi.
  19. Casus in eventu est: licet hic indulgeat ausis,
  20. Consilium tamen est abstinuisse meum.