Epistulae

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Nunc etiam peperi; gratare ambobus, Iason!
  2. Dulce mihi gravidae fecerat auctor onus.
  3. Felix in numero quoque sum prolemque gemellam,
  4. Pignora Lucina bina favente dedi.
  5. Si quaeris, cui sint similes, cognosceris illis.
  6. Fallere non norunt; cetera patris habent.
  7. Legatos quos paene dedi pro matre ferendos;
  8. Sed tenuit coeptas saeva noverca vias.
  9. Medeam timui: plus est Medea noverca;
  10. Medeae faciunt ad scelus omne manus.
  11. Spargere quae fratris potuit lacerata per agros
  12. Corpora, pignoribus parceret illa meis?
  13. Hanc tamen o demens Colchisque ablate venenis,
  14. Diceris Hypsipyles praeposuisse toro.
  15. Turpiter illa virum cognovit adultera virgo;
  16. Me tibi teque mihi taeda pudica dedit.
  17. Prodidit illa patrem; rapui de clade Thoanta.
  18. Deseruit Colchos; me mea Lemnos habet.
  19. Quid refert, scelerata piam si vincet et ipso
  20. Crimine dotata est emeruitque virum?