Epistulae

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Aeolis Aeolidae, quam non habet ipsa, salutem
  2. Mittit et armata verba notata manu;
  3. Siqua tamen caecis errabunt scripta lituris,
  4. Oblitus a dominae caede libellus erit.
  5. Dextra tenet calamum, strictum tenet altera ferrum,
  6. Et iacet in gremio charta soluta meo.
  7. Haec est Aeolidos fratri scribentis imago;
  8. Sic videor duro posse placere patri.
  9. Ipse necis cuperem nostrae spectator adesset,
  10. Auctorisque oculis exigeretur opus!
  11. Ut ferus est multoque suis truculentior Euris,
  12. Spectasset siccis vulnera nostra genis.
  13. Scilicet est aliquid, cum saevis vivere ventis;
  14. Ingenio populi convenit ille sui.
  15. Ille Noto Zephyroque et Sithonio Aquiloni
  16. Imperat et pinnis, Eure proterve, tuis.
  17. Imperat heu! ventis, tumidae non imperat irae,
  18. Possidet et vitiis regna minora suis.
  19. Quid iuvat admotam per avorum nomina caelo
  20. Inter cognatos posse referre Iovem?