Satires

Horace

Horace. The Works of Horace. Vol. II. Smart, Christopher, editor. Philadelphia: J. Whetham, 1836.

  1. Fuscus Aristius occurrit, mihi carus et illum
  2. qui pulchre nosset. consistimus. ‘unde venis et
  3. quo tendis?’ rogat et respondet. vellere coepi
  4. et pressare manu lentissima bracchia, nutans,
  5. distorquens oculos, ut me eriperet. male salsus
  6. ridens dissimulare; meum iecur urere bilis.
  7. ‘certe nescio quid secreto velle loqui te
  8. aiebas mecum.’ ‘memini bene, sed meliore
  9. tempore dicam; hodie tricensima sabbata: vin tu
  10. curtis Iudaeis oppedere?’ ‘nulla mihi’ inquam
  11. ‘relligio est.’ ‘at mi: sum paulo infirmior, unus
  12. multorum. ignosces; alias loquar.’ huncine solem
  13. tam nigrum surrexe mihi! fugit inprobus ac me
  14. sub cultro linquit. casu venit obvius illi
  15. adversarius et ‘quo tu, turpissime?’ magna
  16. inclamat voce, et ‘licet antestari?’ ego vero
  17. oppono auriculam. rapit in ius; clamor utrimque,
  18. undique concursus. sic me servavit Apollo.