Epodi

Horace

Horace. Q. Horati Flacci Carmina. Vollmer, Friedrich, editor. Leipzig: Teubner, 1912.

  1. “venena maga non fas nefasque, non valent
  2. convertere humanam vicem.
  3. diris agam vos: dira detestatio
  4. nulla expiatur victima.
  5. quin, ubi perire iussus exspiravero,
  6. nocturnus occurram Furor
  7. petamque voltus umbra curvis unguibus,
  8. quae vis deorum est Manium,
  9. et inquietis adsidens praecordiis
  10. pavore somnos auferam.
  11. vos turba vicatim hinc et hinc saxis petens
  12. contundet obscaenas anus;
  13. post insepulta membra different lupi
  14. et Esquilinae alites
  15. neque hoc parentes, heu mihi superstites,
  16. effugerit spectaculum.”