Epodi
Horace
Horace. Q. Horati Flacci Carmina. Vollmer, Friedrich, editor. Leipzig: Teubner, 1912.
- Nox erat et caelo fulgebat Luna sereno
- inter minora sidera,
- cum tu, magnorum numen laesura deorum,
- in verba iurabas mea,
- artius atque hedera procera adstringitur ilex
- lentis adhaerens bracchiis;
- dum pecori lupus et nautis infestus Orion
- turbaret hibernum mare
- intonsosque agitaret Apollinis aura capillos,
- fore hunc amorem mutuom,
- o dolitura mea multum virtute Neaera:
- nam siquid in Flacco viri est,
- non feret adsiduas potiori te dare noctes
- et quaeret iratus parem
- nec semel offensi cedet constantia formae,
- si certus intrarit dolor.