Epodi
Horace
Horace. Q. Horati Flacci Carmina. Vollmer, Friedrich, editor. Leipzig: Teubner, 1912.
- neque ut superni villa candens Tusculi
- Circaea tangat moenia:
- satis superque me benignitas tua
- ditavit, haud paravero
- quod aut avarus ut Chremes terra premam,
- discinctus aut perdam nepos.
- “Beatus ille qui procul negotiis,
- ut prisca gens mortalium,
- paterna rura bubus exercet suis
- solutus omni faenore
- neque excitatur classico miles truci
- neque horret iratum mare
- forumque vitat et superba civium
- potentiorum limina.