Epodi

Horace

Horace. Q. Horati Flacci Carmina. Vollmer, Friedrich, editor. Leipzig: Teubner, 1912.

  1. Ibis Liburnis inter alta navium,
  2. amice, propugnacula,
  3. paratus omne Caesaris periculum
  4. subire, Maecenas, tuo:
  5. quid nos, quibus te vita sit superstite
  6. iucunda, si contra, gravis?
  7. utrumne iussi persequemur otium
  8. non dulce, ni tecum simul,
  9. an hunc laborem mente laturi, decet
  10. qua ferre non mollis viros?
  11. feremus et te vel per Alpium iuga
  12. inhospitalem et Caucasum
  13. vel occidentis usque ad ultimum sinum
  14. forti sequemur pectore.