Odes

Horace

Horace, Odes and Epodes. Shorey, Paul,editor; Laing, Gordon Jennings, joint editor. Chicago: B.H. Sanborn and Company, 1919.

  • fecunda culpae saecula nuptias
  • primum inquinavere et genus et domos:
  • hoc fonte derivata clades
  • in patriam populumque fluxit.
  • motus doceri gaudet Ionicos
  • matura virgo et fingitur artibus
  • iam nunc et incestos amores
  • de tenero meditatur ungui.
  • mox iuniores quaerit adulteros
  • inter mariti vina neque eligit
  • cui donet inpermissa raptim
  • gaudia luminibus remotis,
  • sed iussa coram non sine conscio
  • surgit marito, seu vocat institor
  • seu navis Hispanae magister,
  • dedecorum pretiosus emptor.