Odes

Horace

Horace, Odes and Epodes. Shorey, Paul,editor; Laing, Gordon Jennings, joint editor. Chicago: B.H. Sanborn and Company, 1919.

  • Parcus deorum cultor et infrequens,
  • insanientis dum sapientiae
  • consultus erro, nunc retrorsum
  • vela dare atque iterare cursus
  • cogor relictos: namque Diespiter,
  • igni corusco nubila dividens
  • plerumque, per purum tonantis
  • egit equos volucremque currum,
  • quo bruta tellus et vaga flumina,
  • quo Styx et invisi horrida Taenari
  • sedes Atlanteusque finis
  • concutitur. valet ima summis
  • mutare et insignem attenuat deus
  • obscura promens; hinc apicem rapax:
  • Fortuna cum stridore acuto
  • sustulit, hic posuisse gaudet.