Adelphi

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Potius quam venias in periculum, Sannio,
  2. Servesne an perdas totum, dividuum face:
  3. Minas decem conradet alicunde.
Sa.
  1. Hei mihi,
  2. Etiam de sorte nunc venio in dubium miser?
  3. Pudet nihil: omnes dentes labefecit mihi:
  4. Praeterea colaphis tuber est totum caput.
  5. Etiam insuper defrudat? nusquam abeo.
Sy.
  1. Ut lubet.
  2. Numquid vis quin abeam?
Sa.
  1. Immo hercle hoc quaeso, Syre;
  2. Ut ut haec sunt acta, potius quam lites sequar,
  3. Meum mihi reddatur; saltem quanti emta est, Syre.
  4. Scio te non usum antehac amicitia mea:
  5. Memorem me dices esse et gratum.
Sy.
  1. Sedulo
  2. Faciam: sed Ctesiphonem video: laetus est
  3. De amica.
Sa.
  1. Quid quod te oro?
Sy.
  1. Paulisper mane.
CTESIPHO. SYRUS.
Ct.
  1. Abs quivis homine, cum est opus, beneficium accipere gaudeas:
  2. Verum enimvero id demum iuvat, si, quem aequum est facere, is bene facit.
  3. O frater frater, quid ego nunc te laudem? Satis certo scio;
  4. Nunquam ita magnifice quicquam dicam id virtus quin superet tua.
  5. Itaque unam hanc rem me habere praeter alios praecipuam arbitror,
  6. Fratrem homini nemini esse primarum artium magis principem.